Heilsuleikskólinn Háaleiti býður börnum upp á kærleiksríkt og öruggt umhverfi, þar sem einstaklingurinn fær að njóta sín, hver á sinn hátt. Við venjum nemendur við heilbrigðan lífstíl og vonum að það muni fylgja þeim inn í fullorðinsárin.

Skólinn starfar eftir hugmyndafræði Heilsustefnunnar. Markmið skólans er að stuðla að heilsueflingu leikskólasamfélagsins með áherslu á næringu, hreyfingu og sköpun í leik.

Öll börn ættu að alast upp við það að læra að virða heilsu sína og annarra sem ómetanleg verðmæti og grundvöll fyrir fullnægjandi lífi. Í Heilsuleikskólanum Háaleiti er heilsuefling höfð að leiðarljósi í einu og öllu.

Í Heilsustefnunni er unnið markvisst með hreyfingu og sköpun á þann hátt að öll börn fá skipulagðar stundir með sérhæfðum kennurum 1-2 sinnum í viku. Þessar stundir eru fyrirfram skipulagðar og tengjast bæði þeim þáttum sem prófaðir eru í Heilsubók barnsins og áherslum leikskóla. Í næringu er lögð áhersla á hollt heimilisfæði þar sem markmiðið er að auka grænmetis og ávaxtaneyslu og að nota fitu, salt og sykur í hófi. Við samsetningu matseðla er tekið mið af markmiðum Embættis Landlæknis varðandi næringu barna og eru allir matseðlar samþykktir af næringarfræðingi Skóla ehf.

Haustið 2010 fór skólinn síðan á „græna grein", en skólar á grænni grein er alþjóðlegt verkefni á vegum Landverndar, til að auka umhverfismennt og styrkja umhverfisstefnu í skólum. Þeir skólar sem vilja komast á græna grein í umhverfismálum leitast við að stíga skrefin sjö. Þegar því marki er náð fá skólarnir leyfi til að flagga Grænfánanum næstu tvö ár en sú viðurkenning fæst endurnýjuð ef skólarnir halda áfram góðu starfi. Grænfáninn er umhverfismerki sem nýtur virðingar víða í Evrópu sem tákn um árangursríka fræðslu og umhverfisstefnu í skólum. Haustið 2015 hlaut skólinn Grænfánann.

2011 Fór Reykjanesbær af stað með að þróa framtíðarsýn varðandi menntun barna og ungmenna bæjarfélagsins. Þar tóku allir skólar bæjarins þátt í að móta stefnu sem miðar að því að auka læsi- og stærðfræðiþekkingu nemenda. Heilsuleikskólinn Háaleiti hefur verið þátttakandi í að móta þá skólastefnu.

Haustið 2014 byrjaði skólinn í verkefni Landlæknisembættisins Heilsueflandi leikskóli.


Rekstrarumhverfi Heilsuleikskólans Háaleiti

Skólar ehf., einkarekið fyrirtæki í skólarekstri er rekstraraðili Heilsuleikskólans Háaleiti og er með þjónustusamning við Reykjanesbæ. Skólar ehf. var stofnað árið 2000 og sér um rekstur fimm leikskóla. Þeir eru auk Háaleitis; Heilsuleikskólinn Hamravellir í Hafnarfirði, Heilsuleikskólinn Krókur í Grindavík, Heilsuleikskólinn Kór í Kópavogi og Heilsu-ungbarnaleikskólinn Ársól í Reykjavík.

Stefna Skóla ehf. er að auka veg Heilsustefnunnar og fjölga Heilsuleikskólum á Íslandi.

© 2016 - Karellen